سياسة الخصوصية

نجمعو، حسب استعمالك، الأنواع التالية:

• بيانات المتجر (من شوبيفاي): المنتجات، المخزون، المواقع، والطلبيات — نجيبوها عبر الصلاحيات لي توافق عليها وقت الربط.
• بيانات العملاء: اسم الزبون، رقم الهاتف، الولاية/البلدية، والعنوان — ضرورية لتأكيد الطلبية والتوصيل.
• بيانات الحساب: اسم المستخدم، البريد الإلكتروني، والدور (مدير/عضو/مؤكّد).
• بيانات قنوات Meta (اختياري): إذا ربطت صفحاتك ولا إنستغرام ولا واتساب — شوف القسم 3.
• بيانات الإعلانات (اختياري): إحصائيات حسابك الإعلاني إذا ربطت Meta أو TikTok.

• تسيير الطلبيات، المخزون، التأكيد، والتوصيل.
• مزامنة المخزون والطلبيات مع متجرك على شوبيفاي.
• إرسال الطلبيات لشركات التوصيل باش توصل للزبون.
• التحليل والتقارير لمساعدتك تسيّر نشاطك.
• التواصل معك حول حسابك واشتراكك.

ما نستعملوش بياناتك في الإعلان، وما نبيعوهاش لأي طرف.

تقدر تربط صفحاتك على فيسبوك، وحساب إنستغرام المهني، ورقم واتساب بزنس تاعك. ما نوصلو لحتّى حاجة قبل ما توافق من نافذة Meta نفسها، وانت اللي تختار أنهي صفحات وحسابات تدخل.

كي تربط، وغير للحسابات اللي اخترتهم، نوصلو لـ:

• معطيات الصفحة/الحساب: الاسم والمعرّف — باش نسمّيو الربط ونوجّهو الرسائل الداخلة لصاحبها.
• المحادثات: الرسائل اللي يبعثولك الناس على ماسنجر وإنستغرام وواتساب، بمرفقاتها، مع معرّف المرسل واسمو الظاهر — باش تقراهم وتردّ عليهم من صندوق واحد.
• التعليقات: تعليقات منشوراتك وإعلاناتك — باش تردّ علنا ولا تحوّل الحديث لرسالة خاصّة.
• توكنات الوصول: تعطيهم Meta وقت الربط، نخزّنوهم مشفّرين، ونستعملوهم غير للأفعال اللي فوق بالنيابة عليك.
• إحصائيات الإعلانات: مصاريف ونتائج حملاتك، نوريّوهم جنب الطلبيات اللي جابتهم كل حملة.

واش نلتزمو بيه:

• نستعملو هذي البيانات غير باش نقدّمولك الميزات اللي ربطتها من أجلها.
• ما نبيعوهاش، ما نكروهاش، ما نعطوهاش لوسطاء بيانات، وما نبنيوش بيها ملفّات إعلانية ولا نستهدفو بيها.
• نردّو على اللي راسلك هو الأوّل. ما نراسلو حتّى واحد غير هكّاك، إلا عبر قوالب واتساب معتمَدة من Meta.
• تقدر تفصل وقت ما تحبّ — الفصل يحذف التوكن ويقطع وصولنا في الحين.
• ما نحتفظوش بيها أكثر من مدّة نشاط حسابك، ونحذفوها بطلب منك — شوف صفحة حذف البيانات.

نشاركو الحدّ الأدنى الضروري مع مزوّدين يخدمو المنصّة:

• شركات التوصيل (مثل ZR Express): اسم/هاتف/عنوان الزبون + تفاصيل الطلبية، باش توصّل الطرد.
• الاستضافة وقاعدة البيانات (Vercel، Neon): تخزين وتشغيل المنصّة.
• البريد الإلكتروني (Resend): إرسال دعوات ورسائل الحساب.
• شوبيفاي: للمزامنة والفوترة عند الاشتراك عبر شوبيفاي.
• الدفع (Chargily): دفع الاشتراك.
• مزوّدو الذكاء الاصطناعي (Anthropic، وfal.ai للصور والفيديو): كي تشعل ميزة ذكاء اصطناعي، النصّ المعني — ويمكن يكون رسالة زبون راه يحضّرلها ردّ — يتبعث للمزوّد باش ينتج الردّ ولا الصورة. هؤلاء يخدمو بتعليماتنا وما يستعملوش المحتوى في تدريب نماذجهم.

هؤلاء المزوّدون ملزمون بحماية البيانات واستعمالها فقط لتقديم خدمتهم لنا.

نحترمو حقوق الخصوصية بما فيها GDPR. تقدر تطلب الوصول لبياناتك أو حذفها. بالنسبة لبيانات العملاء، ندعمو webhooks الرسمية تاع شوبيفاي:

• طلب بيانات زبون (customers/data_request): نوفّرو البيانات المخزّنة عن الزبون.
• حذف بيانات زبون (customers/redact): نُخفي المعطيات الشخصية للزبون المعني.
• حذف بيانات المتجر (shop/redact): بعد إلغاء التثبيت، نحذفو الربط ونُخفي المعطيات الشخصية للمتجر.

نحتفظو ببياناتك مادام حسابك نشط. كي تلغي تثبيت التطبيق من متجرك، نستقبلو طلب shop/redact من شوبيفاي ونحذفو الربط ونُخفي المعطيات الشخصية خلال المدّة القانونية.

نحمو بياناتك عبر اتصال مشفّر (HTTPS)، وتشفير الأسرار الحسّاسة (مثل مفاتيح الوصول) عند التخزين، والتحقق من صحّة كل إشعار قادم من شوبيفاي (HMAC). رغم ذلك، ما كاش نظام آمن 100%، ونخدمو باستمرار على تحسين الحماية.

نقدرو نحدّثو هذي السياسة من وقت لآخر. أي تغيير مهمّ نبلّغوك بيه، ونحدّثو تاريخ "آخر تحديث" فوق.

مالك المنصّة (الاسم القانوني للنشاط): Oussama Ramdani (اسامة رمضاني) — Place Andalous, Ghardaia 47000, Algeria.

عندك سؤال حول الخصوصية أو تحبّ تمارس حقوقك؟ راسلنا عبر واتساب: 0660 87 55 11